سياسة الخصوصية
آخر تحديث: 19 أكتوبر 2026
الصفحة دي بتشرح بنعمل إيه في بياناتك لما تطلب من محل على سبت. باختصار: بناخد اللي محتاجينه علشان طلبك يوصل بس، مش بنبيعه ولا بنستخدمه في إعلانات، وبنمسحه بعد ما الطلب يخلص بفترة.
مين المسؤول عن بياناتك
سبت منصّة بتربط زباين الحتة بالسوبر ماركت القريب منهم. المحل اللي بتطلب منه هو البايع: هو اللي بيستلم طلبك ويجهّزه ويوصّله، وهو المسؤول عن استخدام بياناتك في الطلب ده. اسم المحل وعنوانه وتليفونه موجودين في صفحة «بيانات المحل» بتاعته.
سبت بيشغّل الموقع ويخزّن البيانات لحساب المحل، وبيستخدم جزء صغير منها علشان يحمي الخدمة من الطلبات الوهمية والإساءة. للتواصل مع سبت: support@sabateg.com.
بنجمع إيه
- بيانات التوصيل اللي بتكتبها: اسمك، رقم موبايلك، المنطقة، العنوان، وتفاصيله لو كتبتها (العمارة والدور والشقة وعلامة مميزة).
- الطلب نفسه: المنتجات والكميات، الحاجات اللي كتبتها بإيدك، ملاحظاتك، طريقة الدفع، والفكة اللي محتاجها.
- لو دفعت بإنستاباي: الاسم اللي حوّلت بيه.
- اللي بيحصل في الطلب: حالته ووقت كل تغيير، وأي مشكلة بتبلّغ عنها.
- بيانات تقنية علشان الأمان: عنوان الإنترنت (IP) بيتحوّل لرمز مايتعرفش منه حاجة، ويُستخدم بس علشان نحدّ من الطلبات الكتير، وبيتمسح خلال يوم. وفحص من Cloudflare بيتأكد إنك إنسان مش برنامج آلي.
مش بنطلب رقم قومي ولا بيانات كارت ولا كلمة سر، ومافيش حسابات. ومش بنحدد مكانك بالـGPS.
بنستخدمها في إيه
- نبعت طلبك للمحل علشان يجهّزه ويوصّله لك.
- نوريك حالة طلبك، ونسألك لو المحل غيّر حاجة فيه أو الإجمالي زاد.
- المندوب يعرف يوصلك: بيشوف اسمك وتليفونك وعنوانك وطلبك بس.
- نحمي المحلات من الطلبات الوهمية: أول طلب من رقم جديد حدّه 1500.00 ج.م،والرقم اللي يعمل طلب وهمي بيتمنع من الطلب 30 يوم.
- نصلّح الأعطال: تقارير الأخطاء بتتشال منها البيانات الشخصية قبل ما تتبعت.
بنستخدم بياناتك بناءً على موافقتك في صفحة الطلب، وعلشان ننفّذ الطلب اللي إنت طلبته. مش بنبيع بياناتك، ومش بنستخدمها في إعلانات، ومش بنبعتلك رسايل تسويق.
بياناتك بتتخزن برّه مصر
الشركات دي سيرفراتها برّه مصر (أغلبها في ألمانيا، وعند تليجرام وCloudflare). لما بتعلّم على خانة الموافقة في صفحة الطلب، إنت بتوافق إن بياناتك تتنقل وتتخزن هناك. بنختار شركات بتشفّر البيانات وماشية على قواعد حماية بيانات صارمة زي اللائحة الأوروبية.
بنحتفظ بيها قد إيه
- اسمك ورقمك وعنوانك بيتمسحوا من الطلب تلقائيًا بعد 90 يوم من الطلب، لو كان اتسلّم أو اتلغى. ورسالة الطلب على تليجرام بتتعدّل ويتشال منها.
- المنتجات والأسعار والإجمالي بيفضلوا عند المحل لحساباته، من غير اسمك ولا رقمك.
- الرقم الممنوع بسبب طلب وهمي بيفضل في قايمة المنع مدة المنع و30 يوم بعدها.
- النسخ الاحتياطية المشفّرة: اليومية بتتمسح بعد 30 يوم، والشهرية بعد سنة. محدش بيفتحها إلا لو احتجنا نرجّع الموقع بعد عطل كبير.
اللي بيتحفظ على موبايلك
مش بنستخدم كوكيز للتتبّع ولا للإعلانات. الموقع بيحفظ في متصفح موبايلك بس: سبتك، المنطقة اللي اخترتها، بياناتك علشان ماتكتبهاش تاني في الطلب الجاي، وروابط آخر طلباتك. ده بيفضل على جهازك، وتقدر تمسحه من إعدادات المتصفح (مسح بيانات المواقع). لوحة المحل بس، اللي بيستخدمها صاحب المحل، ليها كوكي دخول واحدة.
بنعدّ الزيارات بأداة من Cloudflare مابتستخدمش كوكيز ومابتعرفش إنت مين: بتعرف بس الصفحة اللي فتحتها، وجيت منين (زي واتساب أو فيسبوك)، ونوع الجهاز، والبلد، وسرعة الصفحة. ومش بتشتغل خالص في صفحات سبتك والطلب والدفع.
حقوقك
- تعرف إحنا عندنا إيه عنك، وتاخد نسخة منه.
- تصحّح أي بيانات غلط.
- تطلب مسح بياناتك: بنمسحها من كل طلباتك اللي خلصت في كل المحلات. ولو عندك طلب لسه مفتوح، بنمسحها أول ما يخلص لأن المحل محتاج العنوان علشان يوصّل. وتقدر تلغي الطلب من صفحته طول ما هو مستني المحل يقبله.
- تسحب موافقتك في أي وقت. ده مش بيأثر على اللي اتعمل قبل كده، بس من غير بياناتك مش هنقدر نوصّلك طلبات جديدة.
- تعترض على أي استخدام لبياناتك.
علشان تستخدم أي حق من دول كلّم المحل اللي طلبت منه، أو ابعتلنا على support@sabateg.com واكتب رقم موبايلك. هنتأكد إن الرقم بتاعك قبل ما نعمل أي حاجة، وهنرد في أسرع وقت وفي مدة ماتزيدش عن 30 يوم. ولو مش راضي عن ردّنا، من حقك تشتكي لمركز حماية البيانات الشخصية.
بنحمي بياناتك إزاي
الاتصال بالموقع مشفّر، وقاعدة البيانات مقفولة بصلاحيات بحيث كل محل يشوف طلباته هو بس، ولوحة الإدارة محمية بكلمة سر ورمز تحقق من الموبايل. ولو حصل تسريب يمسّ بياناتك، هنبلّغ الجهة المختصة ونبلّغك.
للكبار بس
سبت معمول للي عندهم 18 سنة أو أكتر. لو سنك أقل، خلّي حد كبير في البيت يطلب.
لو غيّرنا السياسة دي
هنغيّر تاريخ «آخر تحديث» اللي فوق. وخانة الموافقة في كل طلب جديد بتكون على آخر نسخة. وشوف كمان شروط الاستخدام.
السياسة دي ماشية على قانون حماية البيانات الشخصية المصري رقم 151 لسنة 2020 ولائحته التنفيذية.